पहिलो जित निकाल्न कर्णालीले चितवनबाट पायो १३१ रनको लक्ष्य 

इंग्ल्यान्डका अलराउन्डर रवि बोपराको अर्धशतक मद्दतमा चितवन राइनोजले एनपिएलमा कर्णाली याक्सलाई १३१ रनको लक्ष्य प्रस्तुत गरेको छ । 

कीर्तिपुरस्थित त्रिवि क्रिकेट मैदानमा टस हारेर ब्याटिङ गरेको चितवनले निर्धारित २० ओभरमा १३० रन बनायो । 

चितवनका लागि खेलिरहेका इंग्ल्यान्डका अलराउन्डर रवि बोपराले ४० बलमा सात चौका र एक छक्कासहित अविजित सर्वाधिक ५९ रन बनाए । यसअघि उनले १७.१ ओभरमा सोमपाललाई चौका प्रहार गर्दै ५० रन पूरा गरेका थिए । उनको अर्धशतकसँगै चितवनले १११ रन बनाउँदा ६ विकेट गुमाएको थियो । उनी लगातार दोस्रो अर्धशतक बनाउने एनपिएलको पहिलो खेलाडी बनेका छन् । 

कप्तान कुशल मल्लले २७ बलमा २३ रन बनाएर आउट भए । विपिन रावलले ११ बनाएका हुन् । कर्णालीका कप्तान सोमपाल कामीले चितवनका २० वर्षीय ओपनर लक बेन्केनस्टेइनलाई बोल्ड गर्दै डकआउट गराएका थिए । अर्का ओपनर दीपक बोहरा आठ, नामिबियाका जान निकोल  इटन नाै, सोहेल तनविर डकआउट र अमर रौटेला नाै रन बनाए आउट भएका थिए । शरद भेषवाकर ६ रनमा अविजित रहे । 

नेपाल यू– १६ टिमबाट खेलिसकेका विपिन शर्माले चार ओभरमा २१ रन खर्चिँदै तीन विकेट लिए । ओमानका पूर्वकप्तान जिसन मक्सुदले दुई तथा सोमपाल कामी, नन्दन यादवले समान एक विकेट लिएका थिए । गुल्सन झा र युनिशविक्रम ठकुरी तथा पहिलो खेल खेलिरहेका अस्ट्रेलियाका विलियम बोसिस्टो विकेटविहीन भए । 

प्रतियोगितामा कर्णाली याक्स पहिलो जितको खोजीमा छ । यसअघि टोली जनकपुरसँग आठ विकेट तथा काठमाडौंसँग तीन विकेटले पराजित भएको थियो । 

चितवन लगातार तेस्रो जितको खोजीमा छ । तनविर चम्किएपछि चितवनले पोखरालाई ८७ रन र काठमाडौंलाई पाँच विकेटले हराएको थियो ।