ब्रह्मज्ञानले देखाउँछ जिउँदै मुक्तिको बाटो : मानसिंह तिरुवा

लठ्ठाघाट (महेन्द्रनगर), ३० साउन । सन्त निरंकारी सत्संग भवन लठ्ठाघाटमा मुक्ति पर्वको अवसरमा विशेष सत्संग कार्यक्रम सम्पन्न भएको छ। कार्यक्रममा मोह–मायाको बन्धनबाट मुक्त हुँदै ब्रह्मज्ञानको माध्यमबाट जीवनलाई सही मार्गमा डोर्‍याउनु नै वास्तविक मुक्ति भएको आध्यात्मिक सन्देश प्रवाह गरिएको थियो।

पिपरिया सत्संग भवनका इन्चार्ज मानसिंह तिरुवाले सत्संगमा सहभागी सन्त–भक्तहरूलाई सम्बोधन गर्दै मोह–मायाको जालबाट बाहिर आउनु नै मुक्ति भएको बताउनुभयो। उहाँले जीवन रहँदै मुक्ति प्राप्त गर्नु नै वास्तविक मुक्ति भएको उल्लेख गर्दै सद्गुरुको शरणमा आएर ब्रह्मज्ञान प्राप्त गर्न सके मानवले जिउँदै मुक्तिको अनुभूति गर्न सक्ने बताउनुभयो।

उहाँले ब्रह्मज्ञानले मानव जीवनलाई सही आध्यात्मिक मार्गमा डोर्‍याउने बताउँदै सद्गुरुको द्वारमा प्राप्त हुने ज्ञानलाई जीवनमा व्यवहारमा उतार्न सके मनुष्यले मोह, माया तथा सांसारिक बन्धनबाट माथि उठ्दै जीवनको वास्तविक उद्देश्य बुझ्न सक्ने उल्लेख गर्नुभयो।

दोधारा चाँदनी सत्संग भवनका मुखी भक्त सुनारले आफू सद्गुरुको शरणमा आएपछि आत्मा र परमात्माबीचको सम्बन्धको अनुभूति भएको बताउनुभयो। उहाँले सद्गुरुको शरणमा आएर आत्माको परमात्मासँग नाता जोडिएपछि नै वास्तविक मुक्ति प्राप्तिको अनुभूति हुने बताउँदै ब्रह्मज्ञानले मानवलाई आफ्नो वास्तविक स्वरूप पहिचान गर्न सहयोग गर्ने उल्लेख गर्नुभयो।

उहाँले सन्त निरंकारी मिशनको आध्यात्मिक सन्देशलाई मानव समाजसम्म पुर्‍याउन ज्ञात–अज्ञात रूपमा योगदान तथा बलिदान गर्ने महान् सन्त–महात्माहरूको स्मरणमा मुक्ति दिवस मनाइँदै आएको बताउनुभयो। दिवंगत ब्रह्मलीन महात्माहरूलाई श्रद्धापूर्वक स्मरण गर्दै बाबा बुटा सिंहजी, बाबा अवतार सिंहजी, बाबा गुरबचन सिंहजी, बाबा हरदेव सिंहजी तथा सद्गुरु माता सविन्दर हरदेव सिंहजीले मानव कल्याण र आध्यात्मिक जागरणका क्षेत्रमा पुर्‍याउनुभएको योगदानलाई पनि यस अवसरमा स्मरण गरिएको उहाँले बताउनुभयो।

मुक्ति पर्वले विगतका महान् सन्तहरूको योगदानलाई स्मरण गर्नुका साथै उनीहरूले देखाएको प्रेम, त्याग, सेवा, समर्पण र ब्रह्मज्ञानको मार्गलाई वर्तमान जीवनमा आत्मसात् गर्न प्रेरणा दिने वक्ताहरूले बताएका थिए। मोह–मायाको बन्धनबाट मुक्त हुँदै अहंकार, लोभ, क्रोध तथा अन्य विकार त्यागेर प्रेम, सद्भाव र मानव सेवाको भावमा जीवन जिउन सके मात्र मुक्ति पर्वको वास्तविक उद्देश्य पूरा हुने उनीहरूको भनाइ थियो।

सत्संगमा प्रहरी विभागका प्रतिनिधि, पूर्व राज्यमन्त्री मानबहादुर सुनार, समाजसेवी तथा नेता मदन सुनारलगायत श्रद्धालु एवं आस्थावान् व्यक्तिहरूको उपस्थिति रहेको थियो।

कार्यक्रमको सञ्चालन सुरत सुनारले गर्नुभएको थियो। सत्संगले ब्रह्मज्ञान, आत्मबोध, सद्गुरुको शरण तथा मोह–मायाबाट मुक्त जीवनको आध्यात्मिक सन्देश प्रवाह गर्दै सहभागी सन्त–भक्तलाई आत्मचिन्तन र मानव सेवाको मार्गमा अघि बढ्न प्रेरित गरेको थियो।