हरियाणामा एकै महिलाले जन्माइन् चार सन्तान, दुई छोरा र दुई छोरी जन्मिएपछि परिवारमा खुसीयाली

हरियाणा, २४ कार्तिक । एउटा सन्तान जन्माउन वर्षौँसम्म प्रतीक्षा गर्ने परिवारका लागि चार सन्तान एकैपटक जन्मिनु निकै दुर्लभ र खुसीको विषय हो । हरियाणाको सिरसा नजिकै पर्ने टिटुखेडा गाउँमा एक महिलाले एकैपटक चार सन्तानलाई जन्म दिएपछि परिवारमा खुसीयाली छाएको छ । उनले दुई छोरा र दुई छोरीलाई जन्म दिएकी हुन् ।

स्थानीय सञ्चारमाध्यमका अनुसार गर्भावस्थामा गरिएको सुरुको जाँचमा दुईवटा भ्रूण देखिएको थियो । त्यसपछि तेस्रो पटक जाँच गराउँदा तीनवटा र चौथो पटक भिडियो एक्सरे गराउँदा चारवटा बच्चा रहेको जानकारी चिकित्सकले दिएका थिए । तर, परिवारका अनुसार सुरुमा सरकारी स्वास्थ्य संस्थामा परीक्षण गराउँदा तीनवटा बच्चा रहेको बताइएको थियो । पछि निजी स्वास्थ्य संस्थामा जाँच गराउँदा चारवटा बच्चा रहेको जानकारी पाइएको थियो ।

परिवारका सदस्यका अनुसार चिकित्सकले सुरुमा तीनवटा बच्चा रहेको बताएपछि उनीहरू चिन्तित बनेका थिए । तीन सन्तानलाई कसरी हुर्काउने भन्ने चिन्ता भइरहेका बेला चारवटा बच्चा जन्मिएपछि आश्चर्यसँगै खुसी पनि थपिएको छ ।

सुत्केरी महिलाले आफ्नो विवाह भएको एक वर्ष तीन महिना मात्रै भएको बताइन् । छोटो वैवाहिक जीवनमै एकैपटक चार सन्तानको आमा बन्न पाउँदा आफू निकै खुसी भएको उनको भनाइ छ । ‘भगवानले दुवै चिज दिनुभयो, छोरा पनि दिनुभयो, छोरी पनि दिनुभयो,’ उनले भनिन्, ‘भगवानले दिनुभएको हो, हामी हुर्काउँछौँ ।’

चार नवजात शिशुमध्ये दुई छोरी र दुई छोरा छन् । परिवारले दुई छोरीको नाम किस्मत र समनदीप राखेको छ भने छोराहरूको नाम भने अझै तय गरिसकेको छैन ।

बच्चाहरूको स्वास्थ्य अवस्थाबारे सोध्दा आमाले उनीहरू केही कमजोर देखिएको बताइन् । ‘अलि मोटा छैनन्, थोरै कमजोर छन्,’ उनले भनिन् । यद्यपि, परिवारमा उनीहरूको जन्मले उत्साह थपेको छ ।

बच्चाहरूकी हजुरआमाले चार सन्तान एकैपटक जन्मिएको खबरले आफूहरू अत्यन्तै खुसी भएको बताइन् । परिवारका अन्य सदस्य, आफन्त र छिमेकीहरू पनि बधाई दिन घर पुगिरहेका छन् । टाढा–टाढाबाट आफन्तले फोनमार्फत समेत शुभकामना दिइरहेको परिवारले जनाएको छ ।

परिवारका एक सदस्यले बच्चाहरू जन्मिनुअघि तीनवटा मात्रै रहेको जानकारी पाउँदा आफूहरू डराएको बताए । पछि चारवटा बच्चा रहेको थाहा पाएपछि आश्चर्य लागेको उनको भनाइ छ । ‘मालिकले जे दिनुभयो, त्यही स्वीकार छ । हामीले केही गरेका होइनौँ,’ उनले भने ।

परिवारका सदस्यले बच्चाहरूको जन्मलाई ईश्वरको कृपाका रूपमा लिएका छन् । चार सन्तानको जन्मपछि घरमा आउने आफन्त र छिमेकीले पनि चारै जनालाई एकैसाथ बधाई दिइरहेका छन् ।

एक छिमेकीले रमाइलो गर्दै चार सन्तान जन्मिएपछि बधाई पनि चार गुणा दिनुपर्ने बताए । पहिले एक बच्चा जन्मिँदा दिइने उपहार र आशीर्वाद अब चार जनाका लागि दिनुपर्ने भन्दै उनले खुसी व्यक्त गरे । अर्का छिमेकीले पहिले सय रुपैयाँ दिने चलन भए अब चार जनाका लागि चार सय रुपैयाँ दिनुपर्ने भन्दै ठट्टा गरेका थिए ।

परिवारका अनुसार उनीहरू विगत चार–पाँच वर्षदेखि भाडाको घरमा बस्दै आएका छन् । चार नवजात शिशुको जन्मसँगै परिवारमा थप जिम्मेवारी र खुसी दुवै थपिएका छन् । गाउँलेहरूले पनि यस घटनालाई दुर्लभ र आश्चर्यजनक जन्मका रूपमा लिएका छन् ।