११ महिनामा अमेरिकाबाट चार सय ४० नेपाली निष्कासित
निष्कासनमा परेका केही ३० वर्षदेखि बस्दै आएका थिए अमेरिकामा
अमेरिकाले पछिल्लो ११ महिनामा ४४० नेपालीलाई निष्कासन गरेको छ । निष्कासित हुनेमा धेरै अवैध रूपमा अमेरिका प्रवेश गर्नेहरू छन् । २० जनवरी २०२४ मा अमेरिकाको राष्ट्रपतिमा डोनाल्ड ट्रम्पले कार्यभार सम्हालेपछि अवैध आप्रवासीमाथिको कारबाहीलाई तीव्रता दिएका हुन् । सोही अभियानअन्तर्गत ठुलो संख्यामा नेपालीसमेत परेका छन् ।
यसरी फर्काइनेहरूमा ३० वर्षदेखि अमेरिकामा बस्दै आएकासमेत रहेको प्रहरीको मानव बेचबिखन अनुसन्धान ब्युरोका प्रमुख एसएसपी कृष्णप्रसाद पंगेनी बताउँछन् । विद्यार्थी भिसामा पुगेका केहीलाई पनि निष्कासन गरिएको छ । वैध रूपमा गएको भए पनि त्यहाँको कानुन उल्लंघन गरेका कारण पनि कतिपय निष्कासनमा परेका छन् । अमेरिकाले पटक–पटक चार्टड विमानमा नेपालीहरूलाई काठमाडौंमै ल्याएर छाड्ने गरेको छ । विगतको तुलनामा यो वर्ष निष्कासन हुनेको संख्या बढी छ । विगतमा एक वर्षमा करिब एक सय नेपाली निष्कासनमा पर्ने गरेको तथ्यांकले देखाउँछ ।
पछिल्लो समय निष्कासनमा पर्नेहरूमा सबैभन्दा धेरै दाङ, त्यसपछि पश्चिम रुकुमका छन् । दाङका मात्र १८७ जना निष्कासनमा परेका छन् । त्यस्तै, पश्चिम रुकुमका १३० जना छन् । निष्कासनमा परेकामध्ये कसैले पनि हालसम्म जाहेरी नदिएको एसएसपी पंगेनी बताउँछन् ।
