विश्व योग दिवसमा योग प्रशिक्षण तथा सत्संग सम्पन्न, स्वस्थ जीवनशैलीमा जोड

स्याङ्जा, ६ असार । विश्व योग दिवसको अवसरमा बयरघारी सत्संग भवनमा विशेष योग प्रशिक्षण तथा सत्संग कार्यक्रम आयोजना गरी सम्पन्न गरिएको छ। कार्यक्रममा योग गुरु श्री आनन्द चिलवालको नेतृत्वमा योग अभ्यास तथा स्वास्थ्यसम्बन्धी प्रशिक्षण प्रदान गरिएको थियो।

विश्व योग दिवसको अवसरमा विशेष योग प्रशिक्षण तथा सत्संग कार्यक्रम आयोजना गरी सम्पन्न गरिएको छ। कार्यक्रममा योग गुरु श्री आनन्द चिलवालको नेतृत्वमा योग अभ्यास तथा स्वास्थ्यसम्बन्धी प्रशिक्षण प्रदान गरिएको थियो।

कार्यक्रममा सहभागीहरूलाई योगका विभिन्न आसन, श्वास–प्रश्वासका विधि तथा दैनिक जीवनमा अपनाउन सकिने स्वास्थ्यवर्द्धक अभ्यासबारे जानकारी गराइएको थियो। योग गुरु चिलवालले नियमित योग अभ्यासले शरीरलाई स्वस्थ, मनलाई शान्त र जीवनलाई सन्तुलित बनाउन महत्वपूर्ण भूमिका खेल्ने बताउनुभयो। उहाँले आधुनिक जीवनशैलीका कारण बढ्दै गएका तनाव, अनियमितता तथा विभिन्न स्वास्थ्य समस्याबाट बच्न योगलाई दैनिक जीवनको अभिन्न अंग बनाउनुपर्ने आवश्यकता औंल्याउनुभयो।

उहाँले योग केवल शारीरिक व्यायाम मात्र नभई मानसिक, बौद्धिक र आध्यात्मिक विकासको माध्यम समेत भएको उल्लेख गर्दै नियमित अभ्यासले रोग प्रतिरोधात्मक क्षमता वृद्धि गर्नुका साथै आत्मविश्वास र सकारात्मक सोचको विकास गर्न सहयोग पुग्ने बताउनुभयो। योगमार्फत शरीरका सम्पूर्ण अंगहरू सक्रिय रहने, रक्तसञ्चार सन्तुलित हुने तथा मानसिक एकाग्रता बढ्ने भएकाले हरेक उमेर समूहका व्यक्तिले यसको अभ्यास गर्नुपर्ने उहाँको सुझाव थियो।

योग प्रशिक्षणपछि आयोजित सत्संग कार्यक्रममा सद्गुरु तथा परमात्मा निरगुण–निराकारको महिमाबारे चर्चा गरिएको थियो। वक्ताहरूले योग र आध्यात्मिक साधना एकअर्काका परिपूरक रहेको उल्लेख गर्दै शरीरलाई स्वस्थ राख्न योग र आत्मालाई शान्त एवं जागृत बनाउन सत्संग आवश्यक रहेको धारणा व्यक्त गर्नुभयो।

कार्यक्रममा सहभागीहरूले योग अभ्यासबाट प्राप्त हुने शारीरिक, मानसिक तथा आध्यात्मिक लाभबारे जानकारी हासिल गरेका थिए। साथै, स्वस्थ, अनुशासित र सकारात्मक जीवन निर्माणका लागि नियमित योग अभ्यासलाई निरन्तरता दिने प्रतिबद्धता समेत व्यक्त गरेका थिए।

विश्व योग दिवसको अवसरमा आयोजित उक्त कार्यक्रमले योगप्रति जनचेतना अभिवृद्धि गर्नुका साथै स्वस्थ जीवनशैली, मानसिक शान्ति र आध्यात्मिक उन्नयनको सन्देश प्रवाह गरेको आयोजकले जनाएको छ।