अजिङ्गरले किसानलाई निल्यो, शव सर्पको पेटबाट निकालियो

काठमाडौं, २१ साउन । इन्डोनेसियाको उत्तर मालुकु प्रान्तस्थित सुला टापु क्षेत्रमा एक किसानलाई विशाल रेटिकुलेटेड अजिङ्गरले आक्रमण गरी निलेको अत्यन्तै दुःखद घटना सार्वजनिक भएको छ।

अन्तर्राष्ट्रिय सञ्चारमाध्यमहरूका अनुसार गत जुलाई २७, २०२६ को बिहान करिब ३ बजे ३५ वर्षीय किसान हासिम लुम्बेसी घर फर्किरहेका बेला करिब २३ फिट (७ मिटर) लामो रेटिकुलेटेड अजिङ्गरले जंगलको झाडीबाट अचानक आक्रमण गरेको थियो।

रिपोर्टअनुसार अजिङ्गरले सुरुमा उनको खुट्टामा टोक्दै आफ्नो बलियो शरीरले कस्सिएर बेरेपछि उनी सास फेर्न नसकी घटनास्थलमै मृत्यु भएको जनाइएको छ। त्यसपछि सर्पले उनको शरीर पूरै निलेको बताइएको छ।

बिहानसम्म पनि हासिम घर नफर्किएपछि परिवार र स्थानीयवासीले खोजी अभियान थालेका थिए। खोजीका क्रममा उनको झोला, चप्पल तथा संघर्ष भएको देखिने स्थान फेला परेपछि आसपासको क्षेत्रमा खोजी तीव्र पारिएको थियो। त्यसक्रममा अस्वाभाविक रूपमा पेट फुलेको विशाल अजिङ्गर फेला परेको स्थानीय सञ्चारमाध्यमहरूले उल्लेख गरेका छन्।

स्थानीयवासीले उक्त अजिङ्गरलाई नियन्त्रणमा लिएपछि पेट चिरेर हेर्दा त्यसभित्रबाट हासिमको शव निकालिएको जनाइएको छ।

रेटिकुलेटेड अजिङ्गर संसारकै सबैभन्दा लामो सर्पमध्ये एक मानिन्छ। यस्ता सर्पबाट मानिसमाथि हुने आक्रमण अत्यन्तै दुर्लभ भए पनि इन्डोनेसियाका केही क्षेत्रमा पछिल्ला वर्षहरूमा यस्ता घटनाहरू बेलाबेला सार्वजनिक हुँदै आएका छन्।

वन फँडानी, मानव बस्तीको विस्तार तथा वन्यजन्तुको प्राकृतिक बासस्थानमा बढ्दो हस्तक्षेपका कारण मानिस र वन्यजन्तुबीचको द्वन्द्व बढ्दै गएको वन्यजन्तु विज्ञहरूको भनाइ छ। वन क्षेत्र तथा वन्यजन्तुको बासस्थानमा प्रवेश गर्दा आवश्यक सावधानी अपनाउन उनीहरूले आग्रह गरेका छन्।