बेपत्ताको खबर पर्खिरहेका मनमा मल्हम लगाउँदै टीकापुर

टीकापुर, २१ भदौ । रसुवामा भदौ १० गते आएको विनाशकारी बाढीले घर–आँगन मात्र उजाडेन, प्रियजनको खबर पर्खिरहेका परिवारको मनमा गहिरो पीडा पनि छोडेको छ। यही पीडामा साथ दिन टीकापुर नगरपालिकाभित्र प्रभावित परिवारको घरदैलोमै पुगेर मनोसामाजिक परामर्श सेवा प्रदान गर्ने कार्य भइरहेको छ।

परिवारका सदस्य सम्पर्कविहीन भएपछि उनीहरू अनिश्चितता, चिन्ता र पीडाबीच दिन बिताइरहेका छन्। प्रियजन जीवित छन् कि छैनन् भन्ने टुंगो नहुँदाको पीडा झन् कठिन हुन्छ। यस्तो अवस्थामा उनीहरूको कुरा सुन्ने, भावना बुझ्ने र मनोबल बढाउने प्रयास भइरहेको छ।

यो समय उपदेश दिनेभन्दा पीडितको कुरा सुन्ने र उनीहरूको दुःखमा साथ दिने समय हो। आँसु रोक्नुभन्दा आँसु बगाउँदा साथ दिनु र ‘तपाईंहरू एक्लै हुनुहुन्न’ भन्ने अनुभूति दिलाउनु नै अहिलेको आवश्यकता हो।

विपद्को घडीमा ठूलो सहयोग गर्न नसकिए पनि एउटा फोन, केही समयको साथ र आत्मीय व्यवहारले पीडित परिवारलाई ठूलो हिम्मत दिन सक्छ। त्यसैले आ–आफ्नो ठाउँबाट जे सकिन्छ, मानवताको भावनाले सहयोग गरौँ।

रसुवाको बाढीमा बेपत्ता भएका सबै प्रियजनको सकुशल उद्धार होस् र प्रतीक्षामा रहेका परिवारका आँखामा खुसीका आँसु फर्किऊन् भन्ने कामना गरिएको छ।

विपत्तिले टाढा बनाए पनि मानवताले मन जोड्न सक्छ।