भदौ ७ को पीडाबाट पाठ सिक्दै टीकापुरमा सामाजिक सद्भाव र एकताको आह्वान

टीकापुर, ८ भाद्र । दाङका सुरेन्द्र चौधरीले टीकापुरमा आयोजित कार्यक्रममा भदौ ७ को घटनालाई स्मरण गर्दै सामाजिक सद्भाव, एकता र सहकार्यको आवश्यकता औँल्याएका छन्।

चौधरीले आफ्नो सम्बोधनका क्रममा विगतको घटनालाई उत्तेजना होइन, इतिहासबाट पाठ सिक्ने अवसरका रूपमा लिनुपर्नेमा जोड दिएका छन्। उनले भदौ ७ टीकापुरका लागि तीतो अतीत भएको उल्लेख गर्दै अब विगतका घटनाबाट ऐतिहासिक पाठ सिकेर अघि बढ्नुपर्ने बताएका छन्।

उनले टीकापुरलाई समृद्धिको बाटोमा अघि बढाउन थारु, पहाडी तथा सबै समुदायबीच हातेमालो र सहकार्य आवश्यक रहेको बताए। समाजमा विभाजनभन्दा एकता र आपसी सद्भावलाई प्राथमिकता दिनुपर्ने उनको भनाइ थियो।

समाज मिलाउने जिम्मेवारी सबैको भए पनि रेशम चौधरीको भूमिका अझ महत्वपूर्ण रहेको उल्लेख गर्दै सुरेन्द्र चौधरीले रेशम चौधरीलाई समाजमा मेलमिलाप र सद्भाव कायम गर्न सक्रिय भूमिका निर्वाह गर्न आग्रह गरे।

उनले भने, “रेशमजी, समाज मिलाउनुस्।”

भदौ ७ को घटनालाई बिर्सनुभन्दा त्यसबाट पाठ सिक्दै भविष्यमा त्यस्ता घटना दोहोरिन नदिन सबै समुदाय जिम्मेवार भएर अघि बढ्नुपर्नेमा उनले जोड दिए।

टीकापुरको विकास, समृद्धि र सामाजिक सद्भावका लागि विगतका तीतो अनुभवलाई पछाडि छाड्दै थारु, पहाडी र अन्य सबै समुदायबीच सहकार्य र विश्वासको वातावरण निर्माण गर्नुपर्ने सन्देश चौधरीको सम्बोधनले दिएको छ।