नेपाल–भारत सम्बन्ध संस्कृति र आत्मीयताले जोडिएको छ- मुख्यमन्त्री रेखा गुप्ता (दिल्ली)

दिल्लीमा १५ हजार नेपालीको तीज, बाढीपीडितलाई ४० लाख सहयोग

नयाँदिल्ली, २० सेप्टेम्बर । भारतको राजधानी नयाँदिल्लीमा करिब १५ हजार नेपालीको सहभागितामा हरितालिका तीज समारोह सम्पन्न भएको छ । दिल्ली सरकारको सहयोगमा ‘हाम्रो स्वाभिमान ट्रस्ट’ले आइतबार इन्दिरा गान्धी स्टेडियममा आयोजना गरेको कार्यक्रममा नेपाली कला, संस्कृति र एकताको प्रदर्शनसँगै नेपालका बाढीपीडितका लागि सहयोग जुटाइएको हो ।

गत १३ सेप्टेम्बरमा आयोजना गर्ने तय भएको कार्यक्रम दिल्लीमा भएको ब्रिक्स सम्मेलनका कारण एक साता सारिएको थियो । २० सेप्टेम्बरमा आयोजित तीज कार्यक्रममा गत वर्षभन्दा उल्लेख्य बढी नेपाली सहभागी भएको आयोजकको दाबी छ । दिल्ली सरकारले नेपाली समुदायका लागि यति ठूलो स्तरमा तीज कार्यक्रमलाई प्रत्यक्ष सहयोग गरेको यो पहिलोपटक भएको आयोजकले जनाएको छ ।

कार्यक्रममा दिल्लीकी मुख्यमन्त्री रेखा गुप्ता, पतञ्जली योगपीठका स्वामी रामदेव, आचार्य बालकृष्ण, भारतका लागि नेपाली कार्यवाहक राजदूत डा. सुरेन्द्र थापा तथा दिल्लीका संस्कृति मन्त्री कपिल मिश्रा लगायतको उपस्थिति थियो ।

समारोहलाई सम्बोधन गर्दै स्वामी रामदेवले विश्वका विभिन्न मुलुकमा रहेका नेपाली समुदायसँग आफ्नो परिचय रहेको उल्लेख गर्दै नेपालीहरू इमानदार, मेहनती र आफ्नो संस्कृति तथा परम्परासँग गहिरो रूपमा जोडिएको बताए । उनले तीज समारोहबाट नेपालका बाढीपीडितका लागि करिब ४० लाख रुपैयाँ सहयोग जुटेको भन्दै आयोजक र सहभागीलाई धन्यवाद दिए ।

आचार्य बालकृष्णले दिल्लीमा भएको यो अहिलेसम्मकै ठूलो तीज समारोह भएको बताए । उनका अनुसार कार्यक्रम सफल बनाउन ‘हाम्रो स्वाभिमान’को टोली तीन–चार महिनादेखि तयारीमा जुटेको थियो ।

मुख्यमन्त्री रेखा गुप्ताले नेपाल–भारत सम्बन्ध सदियौँ पुरानो रहेको उल्लेख गर्दै नेपाली महिलाहरू रातो साडी, चुरा, पोते र बिन्दीमा सजिएर तीज मनाउन भेला हुनु नेपाली संस्कृति र पहिचानको प्रतीक भएको बताइन् ।

संस्कृति मन्त्री कपिल मिश्राले गत वर्ष तीज कार्यक्रममा सहभागी भएपछि दिल्लीमा ठूलो संख्यामा नेपालीले यो पर्व मनाउने जानकारी आफूले पाएको बताए । त्यसपछि आफूले मुख्यमन्त्रीसमक्ष विषय राखेको र दिल्ली सरकारले अर्को वर्षदेखि कार्यक्रम आयोजना गर्ने निर्णय गरेअनुसार यसपटक पूर्ण सहयोग गरिएको उनको भनाइ थियो ।

नेपालमा बाढीपहिरोबाट ठूलो क्षति भएका कारण यस वर्ष तीज मनाउने वा नमनाउने विषयमा बहस भइरहेका बेला आयोजकले ‘विपद्लाई शक्तिमा बदल्ने’ मूल भावसहित कार्यक्रम गरेको जनाएको छ । समारोहमा नेपाली कला–संस्कृतिको प्रवर्धन, नेपाल–भारत मैत्री, योगको प्रचार तथा बाढीपीडितका लागि आर्थिक सहयोग संकलनलाई मुख्य प्राथमिकता दिइएको थियो ।

कार्यक्रममा गायक प्रकाश सपूत, इन्द्रेणी टोलीका कृष्ण कँडेल, मनमाया वाइबा, कृष्ण बजगाईं, छत्र शाही र दीपक घिमिरे तथा गायक–गजलकार थानेश्वर गौतम र गायिका आशा बीसीले प्रस्तुति दिए । कृष्ण कँडेलले बाढीबाट नेपालमा भएको क्षतिको पीडा गीतमार्फत प्रस्तुत गर्दै सहयोगका लागि अपिल गरे । प्रकाश सपूतले बाढीका बाबजुद नेपाल पर्यटकका लागि सुरक्षित रहेको सन्देश दिँदै भारतीय नागरिकलाई नेपाल भ्रमणको निम्तो दिए । असामकी बाल कलाकार आध्याश्री उपाध्यायले पनि नृत्य प्रस्तुत गर्दै बाढीपीडितलाई सहयोग गर्न आह्वान गरिन् ।

समारोहमा विभिन्न क्षेत्रमा योगदान पुर्‍याउने व्यक्तित्वलाई ‘हाम्रो गौरव अवार्ड’बाट सम्मान गरिएको थियो । जैव विविधतामा पद्मश्री गम्भीरसिंह योञ्जन, आजीवन उपलब्धिमा भोपालसिंह नेपाली, प्रशासनिक सेवामा देवराज उपाध्याय, संगीतमा शान्ति ठटाल, व्यवसाय तथा उद्यमितामा कृष्ण कडाडिया, खेलकुदमा पद्मश्री जितु राई र पूर्वभारतीय राष्ट्रिय फुटबल कप्तान सुनिल क्षेत्री, कला–संस्कृतिमा विनोद खनाल, साहित्य तथा शिक्षामा डा. गोकुल सिन्हा, महिला सशक्तीकरणमा एसपी यमुना थापा तथा कृषि र जैविक खेतीमा भावेश निरौलालाई सम्मान गरिएको थियो ।

समारोहले नेपाली पर्वलाई भारतको राजधानीमा सार्वजनिक रूपमा प्रवर्धन गर्नुका साथै विपद्का बेला प्रवासी नेपाली समुदायको एकता र मातृभूमिप्रतिको दायित्वसमेत प्रस्तुत गरेको आयोजकको भनाइ छ ।